ລາວ ສົ່ງອອກກາເຟອັນດັບທີ 03 ຂອງອາຊຽນ ແລະອັນດັບທີ 12 ຂອງໂລກ

ຊື້ເລກທີ່ນີ້ ມີແຕ່ໄດ້ກັບໄດ້ 100%


ທ່ານ ຊິນໂຊ ອາເບະ ປະກອບສ່ວນສຳຄັນ ຍົກ
ສາຍພົວພັນ ລາວ-ຢີ່ປຸ່ນ ເປັນຄູ່ຮ່ວມຍຸດທະສາດ

ໃນໄລຍະທີ່​ ທ່ານ ຊິນໂຊ ອາເບະ ດຳລົງຕຳແໜ່ງນາຍົກລັດຖະມົນຕີ ແຫ່ງປະເທດຍີ່ປຸ່ນ, ທ່ານໄດ້ປະກອບສ່ວນອັນສໍາຄັນໃນການສົ່ງເສີມ ແລະ ເພີ່ມທະວີຮັດແໜ້ນການພົວພັນ ແລະ ການຮ່ວມມືທີ່ມີມາແຕ່ດົນນານ ລະ ຫວ່າງ ຍີ່ປຸ່ນ ແລະ ສປປ ລາວ ໃຫ້ໄດ້ຮັບການພັດທະນາຢ່າງບໍ່ຢຸດຢັ້ງ ແລະ ກ້າວໄປເຖິງການຍົກລະດັບຈາກການເປັນຄູ່ຮ່ວມມືຮອບດ້ານ ມາເປັນຄູ່ຮ່ວມຍຸດທະສາດ ຂອງສອງປະເທດ ຍີ່ປຸ່ນ ແລະ ສປປ ລາວ ໃນປີ 2015 ຜ່ານມາ.

ສັງຮວມການເຄື່ອນໄຫວຂອງການນຳລາວ ແລະ ອະດີດນາຍົກ ຊິນໂຊ ອາເບະ ດັ່ງນີ້: ວັນທີ 14-17 ພຶດສະພາ 2007, ທ່ານ ບົວສອນ ບຸບຜາວັນ ນາຍົກລັດຖະມົນຕີແຫ່ງ ສປປ ລາວ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມຍີ່ປຸ່ນຢ່າງເປັນທາງການ ຕາມການເຊື້ອເຊີນຂອງທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ ເຊິ່ງໄດ້ມີການພົບປະສຸດຍອດສອງຝ່າຍ ແລະ ເປັນສັກຂີພິຍານ ໃນການລົງ ນາມໃນເອກະສານໂຄງການຊ່ວຍເຫລືອລ້າ ຈາກລັດຖະ ບານຍີ່ປຸ່ນ ຄື: ໂຄງການກໍ່ສ້າງຂົວຫີນເຫີບ ມູນຄ່າ 933 ລ້ານເຢັນ ແລະໂຄງການທຶນການສຶກສາ ເພື່ອພັດທະນາຊັບພະຍາກອນມະນຸດ ມູນຄ່າ 362 ລ້ານເຢັນ;

ວັນທີ 17 ພະຈິກ 2013, ທ່ານ ຊິນໂຊ ອາເບະ ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແລະ ໄດ້ມີການພົບປະສອງຝ່າຍ ລະຫວ່າງ ທ່ານ ທອງສິງ ທໍາມະວົງ, ນາຍົກລັດຖະ ມົນຕີ ແຫ່ງ ສປປ ລາວ ແລະ ໄດ້ຮ່ວມເປັນສັກຂີພິຍານໃນການລົງນາມບົດບັນທຶກການຮ່ວມມື ໃນຂົງເຂດການຮັກ ສາສຸຂະພາບ ລະຫວ່າງ ກະຊວງສາທາລະນະສຸກ ສປປ ລາວ ແລະ ກະຊວງສາທາລະນະສຸກ, ແຮງງານ ແລະ ສະຫວັດດີການສັງຄົມຍີ່ປຸ່ນ; ວັນທີ 4-7 ມີນາ 2015, ທ່ານ ທອງສິງ ທໍາມະວົງ ນາຍົກລັດຖະມົນຕີ ເດີນທາງຢ້ຽມຢາມທາງການ ແລະ ເຮັດວຽກທີ່ປະເທດຍີ່ປຸ່ນ ໃນໂອກາດສະ ເຫລີມສະຫລອງ ວັນສ້າງຕັ້ງສາຍພົວພັນການທູດລາວ-ຍີ່ ປຸ່ນຄົບຮອບ 60 ປີ ແລະ ໄດ້ພົບປະສອງຝ່າຍກັບ ທ່ານ ຊິນໂຊ ອາເບະ ເຊິ່ງສອງຝ່າຍ ໄດ້ເຫັນດີເປັນເອກະພາບ ຍົກລະດັບສາຍພົວພັນຈາກ ຄູ່ຮ່ວມມືຮອບດ້ານ ເປັນ ຄູ່ຮ່ວມຍຸດທະສາດ.

ໃນວັນທີ 6-8 ກັນຍາ 2016, ທ່ານ ຊິນໂຊ ອາເບະ ໄດ້ ເດີນທາງຢ້ຽມຢາມ ສປປ ລາວຢ່າງເປັນທາງການ ແລະ ເຂົ້າ ຮ່ວມກອງປະຊຸມສຸດຍອດອາຊຽນຄັ້ງທີ 28-29 ທີ່ນະ ຄອນຫລວງວຽງຈັນ. ພ້ອມທັງໄດ້ພົບປະສອງຝ່າຍ ກັບ ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໂດຍໄດ້ປຶກສາຫາລືກ່ຽວກັບການເປັນຄູ່ຮ່ວມມືຍຸດທະສາດ ລະຫວ່າງ ສປປ ລາວ ແລະ ຍີ່ປຸ່ນ, ສອງຝ່າຍໄດ້ຕີລາຄາສູງຕໍ່ການເປັນຄູ່ຮ່ວມມືຍຸດທະສາດ ທີ່ນັບມື້ນັບຂະຫຍາຍຕົວ. ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ສະແດງຄວາມຂອບໃຈ ຕໍ່ການຊ່ວຍເຫລືອທາງການເພື່ອການພັດທະນາ (ODA) ຂອງລັດຖະບານຍີ່ປຸ່ນ ຕະ ຫລອດໄລຍະຜ່ານມາ ໂດຍສະເພາະລັດຖະບານຍີ່ປຸ່ນ ໄດ້ຕົກລົງເຫັນດີໃຫ້ການຊ່ວຍເຫລືອລ້ານອກໂຄງການ ສົກປີ 2016 ແກ່ ສປປ ລາວ ມູນຄ່າ 500 ລ້ານເຢັນ ເພື່ອດຸ່ນດ່ຽງງົບປະມານແຫ່ງຊາດ, ສະແດງຄວາມຂອບໃຈຕໍ່ລັດຖະ ບານຍີ່ປຸ່ນ ທີ່ໄດ້ປະກອບສ່ວນເຂົ້າໃນການຊ່ວຍເຫລືອດ້ານຕ່າງໆ ໃນການເປັນເຈົ້າພາບຈັດກອງປະຊຸມສຸດຍອດອາຊຽນຄັ້ງທີ 28, 29 ແລະ ກອງປະຊຸມທີ່ກ່ຽວຂ້ອງອື່ນໆຕື່ມອີກ.

ໃນວັນທີ 28 ພຶດສະພາ 2016, ທີ່ນາໂກຢາ, ປະເທດຍີ່ປຸ່ນ, ທ່ານ ນາຍົກລັດຖະມົນຕີ ທອງລຸນ ສີສຸລິດ ໄດ້ພົບ ປະສຸດຍອດຢ່າງເປັນທາງການສອງຝ່າຍກັບ ທ່ານ ຊິນໂຊ ອາເບະ ໃນໂອກາດທີ່ເຂົ້າຮ່ວມກອງປະຊຸມເປີດກວ້າງ ຈີ 7(G7) ທີ່ປະເທດຍີ່ປຸ່ນ ຕາມຄໍາເຊີນຂອງລັດຖະບານຍີ່ ປຸ່ນ ໃນຖານະທີ່ ສປປ ລາວ ເປັນປະທານອາຊຽນປີ 2016; ວັນ​ທີ 5 ມິ​ຖຸ​ນາ 2017, ​ທ່ານ ທອງ​ລຸນ ​ສີ​ສຸ​ລິດ ນາ​ຍົກ​ລັດ​ຖະ​ມົນ​ຕີແຫ່ງ ສ​ປ​ປ ລາວ, ໄດ້​ຂຶ້ນ​ກ່າວ​ຄຳ​ປາ​ໄສຕໍ່​ກອງ​ປະ​ຊຸມສາກົນກ່ຽວກັບອະນາຄົດຂອງອາຊີ, ວັນ​ທີ 7 ມິ​ຖຸ​ນາ 2017, ທ່ານນາຍົກລັດຖະມົນຕີ ໄດ້​ທຳ​ການ​ຢ້ຽມ​ຢາມ​ຍີ່​ປຸ່ນ​ຢ່າງ​ເປັນ​ທາງ​ການ ແລະ ໄດ້​ພົບ​ປະ​ສຸດຍອດສອງ​ຝ່າຍ. ໃນນັ້ນ, ຝ່າຍລາວ ໄດ້ສະແດງຄວາມຂອບໃຈຕໍ່ການຊ່ວຍ ເຫລືອຂອງລັດຖະບານຍີ່ປຸ່ນ ໃນດ້ານຕ່າງໆເຊັ່ນ: ການຊ່ວຍເຫລືອທາງການເພື່ອການພັດທະນາ ທີ່ເປັນອັນດັບ 1 ຂອງປະເທດທີ່ໃຫ້ການຊ່ວຍເຫລືອແກ່ ສປປ ລາວ ເຊິ່ງໃນປີ 2016 ມີ 5 ໂຄງການລວມມູນຄ່າທັງໝົດ 13.854 ຕື້ເຢັນ (ປະມານ 122 ລ້ານໂດລາສະຫະລັດ) ແລະ ໃນ 6 ເດືອນຕົ້ນປີ 2017 ກໍມີການລົງນາມເອກະສານແລກປ່ຽນ 2 ໂຄງການ ລວມມູນຄ່າ 367 ລ້ານເຢັນ (ປະມານ 3,7 ລ້ານໂດລາສະຫະລັດ); ການອະນຸມັດໂຄງການຮ່ວມມືດ້ານວິຊາການໃນສົກປີ 2015-2016 ຈໍານວນ 11 ໂຄງການ, ການອະນຸມັດທຶນການສຶກສາໄລຍະຍາວ ລະດັບປະລິນຍາໂທ ແລະ ປະລິນຍາເອກ ເພື່ອສ້າງຂີດຄວາມສາມາດໃຫ້ ສປປ ລາວ ໃນການປັບປຸງວຽກງານບູລະນະຮັກສາທາງຫລວງແຫ່ງຊາດຂອງລາວ; ໂຄງການຊ່ວຍເຫລືອທາງດ້ານການຄຸ້ມຄອງເສດຖະກິດມະຫາພາກ ໂດຍສະເພາະການຄຸ້ມຄອງ ແລະ ເກັບລາຍຮັບເຂົ້າງົບປະມານ; ໂຄງການສ້າງຂີດຄວາມສາມາດໃຫ້ແກ່ການນຳຂັ້ນສູງຂອງ ສປປ ລາວ; ໂຄງການຂະຫຍາຍສະໜາມບິນສາກົນວັດໄຕ; ການສົ່ງອາ ສາສະໝັກຍີ່ປຸ່ນມາຊ່ວຍ ສປປ ລາວ ແລະ ການໃຫ້ທຶນຊ່ວຍເຫລືອລ້າແກ່ ສປປ ລາວ ເຂົ້າໃນໂຄງການເລັ່ງລັດວຽກງານເກັບກູ້ລະເບີດ ເພື່ອສະໜັບສະໜູນໃຫ້ແກ່ວຽກ ງານພັດທະນາຊົນນະບົດ ແລະ ລຶບລ້າງຄວາມທຸກຍາກໄລ ຍະ 2 ເປັນຈໍານວນເງິນ 7,03 ລ້ານໂດລາສະຫະລັດ.

ວັນທີ 12 ມິຖຸນາ 2018, ທີ່ຫ້ອງວ່າການສໍານັກງານນາຍົກລັດຖະມົນຕີຍີ່ປຸ່ນ, ໄດ້ມີການພົບປະສຸດຍອດ ລະ ຫວ່າງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ຊິນໂຊ ອາເບະ ນາຍົກລັດຖະມົນຕີແຫ່ງຍີ່ປຸ່ນ, ໃນໂອກາດດັ່ງກ່າວ, ສອງນາຍົກລັດຖະມົນຕີ ລາວ-ຍີ່ປຸ່ນ ໄດ້ເປັນສັກຂີພິຍານໃນການລົງນາມເອກະສານແລກປ່ຽນ ຄື: ໂຄງການທຶນການສຶກສາເພື່ອພັດທະນາຊັບ ພະຍາກອນມະນຸດ ມູນຄ່າ 310 ລ້ານເຢັນ; ວັນທີ 8 ຕຸລາ 2018, ທີ່ຫ້ອງວ່າການສໍານັກງານນາຍົກລັດຖະມົນຕີຍີ່ ປຸ່ນ, ຫລັງຈາກການພົບປະສຸດຍອດ ລະຫວ່າງ ທ່ານ ທອງລຸນ ສີສຸລິດ ແລະ ທ່ານ ຊິນໂຊ ອາເບະ ຜູ້ນຳທັງສອງໄດ້ຖະ ແຫລງຂ່າວຮ່ວມຕໍ່ສື່ມວນຊົນ ກ່ຽວກັບຜົນການພົບປະສອງຝ່າຍລາວ-ຍີ່ປຸ່ນ. ເພື່ອສືບຕໍ່ຢືນຢັນເຖິງ ການຜັນຂະ ຫຍາຍຂອງການເປັນຄູ່ຮ່ວມຍຸດທະສາດ ຂອງສອງປະເທດ ໃຫ້ເຂົ້າສູ່ລວງເລິກ ແລະ ລວງກ້ວາງ ໃຫ້ແໜ້ນແຟ້ນຍິ່ງໆຂຶ້ນນັ້ນ ຜູ້ນຳທັງສອງໄດ້ເປັນເອກະພາບກັນດັ່ງນີ້: ສປປ ລາວ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມ ມືລະຫວ່າງສອງປະເທດລາວ-ຍີ່ປຸ່ນ ເຊິ່ງໄດ້ຮັບການເສີມຂະຫຍາຍຂື້ນຢ່າງຕໍ່ເນື່ອງ ສະແດງອອກໃນຜົນສຳເລັດຂອງຂົງເຂດການຮ່ວມມືຕ່າງໆ ເປັນຕົ້ນ: ການແລກປ່ຽນການຢ້ຽມຢາມຂອງການນຳຂັ້ນສູງ ຢ່າງເປັນປົກກະຕິ, ການຮ່ວມມືດ້ານເສດຖະກິດ ກໍຄື ດ້ານວັດທະນະທຳ-ສັງຄົມ ແລະ ການທ່ອງທ່ຽວ ມີການຂະຫຍາຍຕົວຂຶ້ນ; ສອງຝ່າຍຕີລາຄາສູງຕໍ່ການຮ່ວມມື ລາວ-ຍີ່ປຸ່ນ ໃນຂອບຂອງການຮ່ວມມືແມ່ນໍ້າຂອງ-ຍີ່ປຸ່ນ ໂດຍສະເພາະການຈັດຕັ້ງປະຕິ ບັດວຽກງານຕ່າງໆ ພາຍໃຕ້ຍຸດທະສາດໂຕກຽວ 2015 ແລະ ແຜນປະຕິບັດງານສຳລັບປີ 2016-2018 ທີ່ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ ແລະ ເຫັນດີຮ່ວມ ກັນ ເພື່ອສືບຕໍ່ເສີມຂະຫຍາຍການຮ່ວມມືລາວ-ຍີ່ປຸ່ນ ໃຫ້ກ້າວສູ່ລວງເລີກ ຄຽງຄູ່ກັບການຍົກລະດັບການພົວພັນລະ ຫວ່າງແມ່ນໍ້າຂອງ ແລະ ຍີ່ປຸ່ນຂຶ້ນເປັນຄູ່ຮ່ວມມື ຍຸດທະ ສາດ ແລະ ພ້ອມກັນພັດທະນາເສດຖະກິດ-ສັງຄົມ ເພື່ອຄວາມສົມບຸນພູນສຸກຂອງປະຊາຊົນ ໃນພາກພື້ນແມ່ນໍ້າຂອງ ກໍຄືການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດລາວ-ຍີ່ປຸ່ນ ໃຫ້ແໜ້ນແຟ້ນຍິ່ງໆຂຶ້ນ.

ສປປ ລາວ ກຽມພ້ອມເຂົ້າຮ່ວມ ຈັດຕັ້ງປະຕິບັດຍຸດ ທະສາດໂຕກຽວ 2018 ທີ່ໄດ້ຖືກຮັບຮອງເອົາໃນກອງປະ ຊຸມສຸດຍອດແມ່ນໍ້າຂອງ-ຍີ່ປຸ່ນ ໃນຄັ້ງນີ້ໃຫ້ປະກົດຜົນເປັນຈິງ; ສອງຝ່າຍຕີລາຄາສູງຕໍ່ຄວາມຄືບໜ້າ ການຈັດຕັ້ງປະຕິ ບັດແຜນການຮ່ວມມືລະຫວ່າງ ສປປ ລາວ ແລະ ຍີ່ປຸ່ນ ແນໃສ່ຊ່ວຍເຫລືອ ສປປ ລາວ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ 8 ກໍຄື ແຜນຍຸດທະສາດຮອດປີ 2025 ແລະ ວິໄສທັດຮອດປີ 2030 ຂອງ ສປປ ລາວ ໃຫ້ສໍາເລັດຕາມຄາດໝາຍທີ່ວາງໄວ້; ສປປ ລາວ ສະ ແດງຄວາມເຫັນໃຈຕໍ່ລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ຮັບຜົນກະທົບຈາກໄພພິບັດທຳມະຊາດ ເປັນຕົ້ນ ໄພນໍ້າຖ້ວມ, ດີນເຈື່ອນ, ພະຍຸໄຕ້ຝຸ່ນ ແລະ ແຜ່ນດິນໄຫວໃນໄລ ຍະທີ່ຜ່ານມາ. ພ້ອມດຽວກັນນີ້, ສປປ ລາວ ກໍສະແດງຄວາມຂອບໃຈມາຍັງລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການຊ່ວຍເຫລືອອັນລໍ້າຄ່າແກ່ ສປປ ລາວ ທີ່ໄດ້ຮັບຜົນກະທົບຈາກໄພພິບັດທີ່ເກີດຂຶ້ນຢູ່ເມືອງສະໜາມໄຊ, ແຂວງອັດຕະປື ເຊິ່ງເປັນການຊ່ວຍເຫລືອທີ່ທັນການ ແລະ ໄດ້ກາຍເປັນກຳລັງໃຈທີ່ສຳຄັນ ໃນການບັນເທົາທຸກແກ່ຜູ້ປະສົບເຄາະຮ້າຍຄັ້ງນີ້ ໃຫ້ຄືນສູ່ສະພາບປົກກະຕິໂດຍໄວ; ສປປ ລາວ ສະແດງຄວາມຂອບໃຈ ມາຍັງລັດຖະບານຍີ່ປຸ່ນ ທີ່ຈະສືບຕໍ່ໃຫ້ການຊ່ວຍເຫລືອ ໃນຂົງເຂດຕ່າງໆ ເຊັ່ນ: ການພັດທະນາພື້ນຖານໂຄງລ່າງ, ການແກ້ໄຂຜົນກະທົບຈາກລະເບີດບໍ່ທັນແຕກ, ການຊ່ວຍເຫລືອດ້ານການເງິນ ແລະ ອື່ນໆ.

ສອງນາຍົກລັດຖະມົນຕີ ໄດ້ເປັນສັກຂີພິຍານ ໃນການລົງນາມສັນຍາການຮ່ວມມືສອງຝ່າຍຄື: ເອກະສານແລກ ປ່ຽນໂຄງການເລັ່ງລັດ ການເກັບກູ້ລະເບີດບໍ່ທັນແຕກ ຢູ່ ສ ປປ ລາວໃນມູນຄ່າ 900 ລ້ານເຢັນ, ສັນຍາການຮ່ວມມືດ້ານວິຊາການລະຫວ່າງໂຮງໝໍມິດຕະພາບ ແລະ ສະຖາ ບັນຜ່າຕັດສະໝອງຄິຕາຮາຣະ (Kitahara) ຍີ່ປຸ່ນ. ໃນວັນທີ 30 ພຶດສະພາ 2019, ທີ່ຫ້ອງວ່າການສໍານັກງານນາຍົກລັດຖະມົນຕີຍີ່ປຸ່ນ, ໄດ້ມີການພົບປະເຮັດວຽກ ແລະ ຮັບປະທານອາຫານທ່ຽງ (Working Lunch) ລະຫວ່າງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ຊິນໂຊ ອາເບະ ນາຍົກລັດຖະມົນຕີແຫ່ງຍີ່ປຸ່ນ, ກ່ອນການພົບປະດັ່ງກ່າວ, ສອງນາຍົກລັດຖະມົນຕີ ລາວ-ຍີ່ປຸ່ນ ໄດ້ເປັນສັກຂີພິຍານໃນການລົງນາມເອກະສານຄື: ເອກະສານແລກປ່ຽນໂຄງການທຶນການສຶກສາ ເພື່ອພັດທະນາຊັບພະຍາກອນມະນຸດ (ສໍາລັບລັດຖະກອນໜຸ່ມນ້ອຍ), ມູນຄ່າ 308 ລ້ານເຢັນ ແລະ ເອກະສານການດັດແກ້ເອກະສານຄັດຕິດ ຂອງສັນຍາການບິນ ລະຫວ່າງ ສປ ປ ລາວ ແລະ ຍີ່ປຸ່ນ.

ທີ່ມາ: ຂປລ,​ ຂ່າວ: ຈ ແກ້ວບົວວັນ,​ ຂໍ້ມູນ: ກະຊວງການຕ່າງປະເທດ

Related Posts

Leave a Reply

Your email address will not be published.