ລ່າວ…… ລາວ…… ລ້າວວວວວວ! ມື້ນີ້ມ່ວນໄດ້ເອົາບົດສຳພາດຂອງເຈົ້າຂອງຄໍາເວົ້າຕິດຫູນີ້ນັ້ນກໍຄື ມິນນີ້ ມິນລະດາ ໂຕແທນຈາກປະເທດລາວໄປປະກວດ Miss International Queen ປີ 2022

ຊື້ເລກທີ່ນີ້ ມີແຕ່ໄດ້ກັບໄດ້ 100%


ລ່າວ…… ລາວ…… ລ້າວວວວວວ! ມື້ນີ້ມ່ວນໄດ້ເອົາບົດສຳພາດຂອງເຈົ້າຂອງຄໍາເວົ້າຕິດຫູນີ້ນັ້ນກໍຄື ມິນນີ້ ມິນລະດາ ໂຕແທນຈາກປະເທດລາວໄປປະກວດ Miss International Queen ປີ 2022 ທີ່ປະເທດໄທມາຝາກ ເພື່ອໃຫ້ທຸກຄົນໄດ້ຮູ້ຈັກໂຕຕົນຂອງມິນນີ້ຜູ້ທີ່ມີຄວາມໝັ້ນໃຈ, ກ້າສະແດງອອກ, ແລະ ມີຫຼາກຫຼາຍຄວາມສາມາດ.

1. ແນະນໍາໂຕໃຫ້ພວກເຮົາໄດ້ຮູ້ຈັກແນ່ເດີ້.

ສະບາຍດີ~ ຊື່ມິນນີ້ ມິນລະດາ ແອ໋ງມະນີ ເດີ້ ເປັນ Miss International Queen Laos ປີ 2022.

2. ມິນນີ້ເຄີຍມີຜົນງານຫຍັງໃນວົງການບັນເທີງມາກ່ອນແດ່?.ວຽກໃນວົງການບັນເທີງທີ່ເຄີຍເຮັດມີ: ເດີນແບບ, ສະແດງຫນັງສັ້ນ, ພິທີກອນ, ເປັນກຳມະການໃນລາຍການ The Survivors EP. 4 ແລະ ອື່ນໆອີກປະປົນກັນໄປ.

3. ເປັນຫຍັງມິນນີ້ຈຶ່ງເລືອກປະກວດໃນເວທີ Miss International Queen 2022?.

ເວທີ Miss International Queen ແນ່ນອນວ່າເປັນຄວາມຝັນສູງສຸດຂອງສາວປະເພດສອງທຸກຄົນທີ່ມັກຮັກໃນການປະກວດນາງງາມ ເພາະວ່າເປັນເວທີອັນດັບ 1 ແລະ ເປັນເວທີທີ່ສາວປະເພດສອງໃຝ່ຝັນທີ່ຈະໄປສ້າງຕໍານານຂອງຕົນເອງ.

4. ທັດສະນະຄະຕິຕໍ່ມາດຕະຖານຄວາມງາມຂອງມິນນີ້ແມ່ນແນວໃດ?

ທຸກຄົນມີຄວາມງາມໃນແບບສະບັບຂອງໃຜມັນ, ບໍ່ມີຜູ້ໃດງາມກວ່າໃຜ, ບໍ່ມີຜູ້ໃດດ້ອຍ ແລະ ບໍ່ມີຜູ້ໃດດີກວ່າໃຜ. ທຸກຄົນມີຄວາມງາມເປັນເອກະລັກ, ມີແບບຢ່າງເປັນຂອງຕົນເອງ, ທຸກຄົນມີພຽງໜຶ່ງດຽວເທິງໂລກນີ້ບໍ່ມີຮອງສອງ ແລະ ທຸກຄົນນັ້ນພິເສດ.

5. ເຮົາຄວນເຮັດແນວໃດເມື່ອມີຄົນມາ Body shaming ເຮົາ?

ຖ້າມີຄົນມາ Body-shaming ເຮົາ ເຮົາກໍບໍ່ສາມາດບໍ່ຮັບຟັງ, ບໍ່ສົນໃຈໄດ້ ເພາະວ່າເຮົາກໍເປັນຄົນໆໜຶ່ງທີ່ມີຄວາມຮູ້ສຶກ. ແຕ່ວ່າໃນທາງກັບກັນ, ການທີ່ເຂົາເວົ້າແນວນັ້ນມັນກໍກາຍເປັນແຮງດັນໃຫ້ເຮົາພັດທະນາຕົນເອງໃຫ້ດີຂຶ້ນ ຍົກຕົວຢ່າງຄື ມິນນີ້ນັ້ນເປັນສາວ Plus size ເປັນສາວ Real size beauty ເຊິ່ງມິນນີ້ກໍພ້ອມຮັບຟັງ ພ້ອມທີ່ຈະປັບປຸງໂຕເອງໃຫ້ຫຼາຍຂຶ້ນ ເພາະວ່າການທີ່ເປັນສາວຮ່າງໃຫຍ່ກໍເຮັດໃຫ້ເຮົາໃຊ້ຊີວິດແຕກຕ່າງເພາະມາດຖານຄວາມງາມຂອງປະເທດລາວໃນປັດຈຸບັນນີ້ກະຄືຕ້ອງຈ່ອຍ, ຕ້ອງໂຕນ້ອຍ, ຕ້ອງຫຸ່ນພຽວ ການປະຕິບັດໂຕຂອງເຮົາໃນແຕ່ລະມື້ກໍເລີຍຍາກແດ່ ການໄປຊອກຊື້ເສື້ອຜ້າກໍຊອກຍາກເພາະວ່າຄົນລາວສ່ວນຫຼາຍຈະໂຕນ້ອຍ ສ່ວນມິນນີ້ກໍໂຕໃຫຍ່ເລີຍຕ້ອງພະຍາຍາມປັບໃຫ້ໂຕນ້ອຍລົງ ແຕ່ມັນກໍຍາກເພາະມິນນີ້ເປັນຄົນໂຄງກະດູກໃຫຍ່ ແລະ ເປັນ Real size beauty.

6. ມິນນີ້ມີຄໍາແນະນໍາແນວໃດໃນການເພີ່ມຄວາມໝັ້ນໃຈໃຫ້ຕົວເອງທັງການເວົ້າ ແລະ ການສະແດງຄວາມສາມາດ?

ມິນນີ້ຕ້ອງບອກວ່າກ່ອນອື່ນໝົດແມ່ນຕ້ອງເຊື່ອໃຈຕົນເອງວ່າເຮົາເຮັດໄດ້, ໃຫ້ກຳລັງໃຈຕົນເອງດ້ວຍການເຊື່ອໝັ້ນວ່າເຮົານັ້ນບໍ່ໄດ້ດ້ອຍໄປກວ່າໃຜເລີຍ ເພາະວ່າທຸກຄົນມີຄວາມສາມາດ, ມີຄວາມນຶກຄິດ, ຄວາມຖະໜັດໃນດ້ານຕ່າງໆທີ່ທຽບກັນບໍ່ໄດ້. ສຳລັບມິນນີ້ເອງກໍມີຄວາມສາມາດໃນແບບຂອງມິນນີ້ ສຳລັບໝູ່ທຸກໆຄົນກໍມີຄວາມສາມາດໃນແບບຂອງຕົນເອງ. ສະນັ້ນ, ທຸກຄົນມີຄວາມເກັ່ງເທົ່າໆກັນ ຈົ່ງເຊື່ອໝັ້ນໃນຕົນເອງ.

7. ຢາກໃຫ້ມິນນີ້ເວົ້າເຖິງຄວາມພາກພູມໃຈໃນການເປັນ LGBTQ+ ໃຫ້ທຸກຄົນໄດ້ຟັງແດ່.

ມິນນີ້ຮູ້ສຶກພູມໃຈທີ່ຊາດນີ້ໄດ້ເກີດມາເປັນ LGBTQ+ ຄົນໜຶ່ງ. ການໃຊ້ຊີວິດເປັນ LGBTQ+ ໃນຊ່ວງທຳອິດກໍລໍາບາກແດ່ແຕ່ວ່າຫຼັງໆມາປະເທດລາວກໍເລີ່ມເປີດກວ້າງ ແລະ ຍອມຮັບ LGBTQ+ ຫຼາຍຂຶ້ນ ເຮັດໃຫ້ໃຊ້ຊີວິດສະດວກຂຶ້ນ, ທີ່ສຳຄັນຄື LGBTQ+ ທຸກຄົນເປັນຄົນທີ່ເບີກບານສົດໃສ, ມີຫຼາກຫຼາຍສີສັນ, ມີຄວາມສາມາດກ່ຽວກັບວົງການບັນເທີງ, ການແຕ່ງຫນ້າ ແລະ ສື່ມວນຊົນ. ມິນນີ້ຮູ້ສຶກດີໃຈກັບທຸກຄົນ ແລະ ມິນນີ້ກໍພູມໃຈທີ່ເປັນ LGBTQ+.

8. ສຸດທ້າຍນີ້, ຢາກຝາກຫຍັງເຖິງຜູ້ຊົມທາງບ້ານ ແລະ ແຟນຄລັບແດ່?

ຢາກຝາກໃຫ້ແຟນໆທຸກຄົນທັງໃນປະເທດ ແລະ ຕ່າງປະເທດມາເຊຍ, ມາໃຫ້ກຳລັງໃຈມິນນີ້ໃນເວລາກ້າວສູ່ເວທີລະດັບສາກົນ ກໍຄືເວທີ Miss International Queen 2022 ທີ່ມິນນີ້ໄດ້ເປັນໂຕແທນປະເທດລາວໄປປະກວດ. ມິນນີ້ສັນຍາວ່າຈະເຮັດໃຫ້ດີທີ່ສຸດ, ເຮັດໃຫ້ດີກວ່າທຸກມື້, ເຮັດໃຫ້ດີຂຶ້ນເລື້ອຍໆ ແລະ ຈະບໍ່ມີວັນເຮັດໃຫ້ອ່ອນລົງ. ສິ່ງທີ່ມິນນີ້ວາດຝັນໄວ້ຄືການໄດ້ຄອບຄອງມົງກຸດ Miss International Queen 2022 ເຊິ່ງຈະໄດ້ຫຼືບໍ່ໄດ້ມິນນີ້ກໍພ້ອມ ແລະ ຈະພະຍາຍາມເຮັດໃຫ້ມັນອອກມາດີທີ່ສຸດ.

ການປະກວດຮອບສຸດທ້າຍແມ່ນຈະຈັດໃນວັນທີ 25 ມິຖຸນາ ນີ້, ຢ່າລືມພາກັນໄປເຊຍ ແລະ ໃຫ້ກຳລັງໃຈມິນນີ້ໄດ້ໃນການຖ່າຍທອດສົດໃນເພຈ Miss International Queen Pageant ເດີທຸກຄົນ.

ມິນນີ້ ມິນລະດາ ສູ້ໆ!!! 😍 ໂດຍ: ທີມບັນນາທິການ Muan.la #MissInternational #MissInternationalQueen #Laos #MinnieMinladar #Muan #ມ່ວນ #ມ່ວນແບບມີສາລະ

Related Posts

Leave a Reply

Your email address will not be published.